SONY次世代遊戲主機PS5，話咁快已經推出咗將近1年，唔知各位想正價入手嘅朋友抽中籤未呢？定抑制索性含淚食炒價？主機長期缺貨除咗令玩家叫苦連天，最近日本電玩零售店亦表示PS5遊戲接近無人問津，皆因大家都買唔到機...

話說早幾日SONY公布今年第二季度財報（2021年7-9月），當中顯示7-9月份PS5銷量達330萬部，比起上季嘅220萬部銷量增長咗唔少，由推出至今累積銷量為1,370萬部。雖然數據上就顯示第二季度出貨量已經多咗110萬部，但實際上批貨就好似跌咗入黑洞咁，仍然有大量機迷買唔到機，正價入手之日遙遙無期。

最近東京電視台就採訪一間位於東京嘅電玩零售店，可見到貨架上排滿PS5遊戲碟。期間店主向記者表示，每個月返唔返到1-2部PS5都係未知之數，由於擁有主機嘅客人好少，所以PS5遊戲銷情非常慘淡，仲表示店鋪經營情況嚴峻。