退役巴士除咗拎去劏同送入博物館仲有咩用？日本有廠商就忽發奇想，將巴士改裝成流動桑拿房，試諗下可以一邊嘆住桑拿一邊欣賞窗外迷人景色，你都咪話唔正啊！

最近日本兵庫縣姬路市嘅「神姬巴士」公司，聯合日本最大桑拿搜尋網站「サウナイキタイ」合作，將旗下3部退役舊巴士改裝成移動桑拿房「SABUS」，顧名思義就係SAUNA（桑拿）同BUS嘅合體，為廢棄交通工具賦予新生命。

據官方介紹，巴士外觀將會保持原樣，而車廂內部就會大改造，但整體風格依然保持懷舊特色，用上木造長椅加上標誌性嘅吊環扶手，當「乘客」按落車鐘嗰時，就會有水撒向桑拿石蒸發出熱蒸汽。預計2022年2月開始正式營運，若然到時已經通關（希望啦），大家又有冇興趣去試下呢？