世界之大確實乜人都有，有人鍾意模型但就冇時間砌，又有人純粹鍾意砌模型嘅過程。日本Freelance平台Coconala就充斥住大量代砌高達模型服務，素組收費最平500日元（約HKD$34）就有交易。

日本網站Coconala同其他Freelance平台大同小異，同樣提供一個地方畀用戶販賣技能或委託工作，例如代寫文章、簡單平面設計、架設網站甚至算命都有，當中就有唔少用戶提供代組模型服務，素組收費最平為500日元（約HKD$34），塗裝就需要3000日元（約HKD$200），但如果要更高級嘅修正或改造，例如將大腿、頸部延長等，費用就可能要增加至10000日元（約HKD$680），咁當然費用亦會隨模型難度增加嘅。

有趣嘅係，呢個平台除咗有代砌模型服務之外，仲有其他五花八門嘅服務，例如代客掃墓及代客參拜寺廟，方便一啲住得較遠或行動不便嘅人士。