自近年超級英雄電影崛起稱霸全球票房，唔少荷里活名導都大為反感，先有Martin Scorsese（馬田·史高西斯）批評Marvel電影猶如主題公園並非電影，後有《DUNE（沙丘瀚戰）》導演Denis Villeneuve公開批評Marvel電影只係「複製貼上」，如今奧斯卡金像名導Ridley Scott亦加入行列，爆粗炮轟超級英雄電影無聊得跟屎一樣（They’re fxxking boring as shxt）。

近日Ridley Scott為宣傳新作《House of Gucci（GUCCI名門望族）》接受外媒Deadline專訪時，主動分享對時下超級英雄電影嘅睇法「幾乎所有優秀嘅電影，都係由角色所推動......嗰啲超級英雄電影真係無聊得跟屎一樣，劇本亦超級爛。」然後再以自己三部執導作品為例，分別係1979年《Alien（異形）》、1982年《Blade Runner（銀翼殺手）》以及2000年《Gladiator（帝國驕雄）》，並表示「我認為呢三部作品都係優秀嘅超級英雄電影，點解依家嘅超級英雄電影就冇更好嘅故事？......我所指嘅係，時下嘅超級英雄電影都係靠特效充場面，只要肯畀錢就拍到。」

老套啲講句，電影類型呢家嘢真係各花入各眼，名導們或者會不屑超級英雄電影只係玩特效、劇本唔夠好、好公式化，但票房成績確實反映大眾就係鍾意睇呢啲，又唔使吓吓都比較嘅。話時話，Ridley Scott幾時肯拍埋《異形》啲續集？