除咗小說，動漫之外，電子遊戲亦係唔少電影人熱衷改編嘅選材，歷年嚟亦出現過唔少出色嘅Game改電影，咁當然都有好似《魔物獵人》呢類飽受爭議嘅作品。早喺2018年，CAPCOM就宣布要推出《洛克人》真人版電影，事隔多年最近終於有新消息，有傳該作好有可能會獨家登陸Netflix，但就未知演員陣容同幾時開拍，唔知會搵邊個做主角呢？

據外媒nintendolife報導，負責《洛克人》真人版電影嘅製作公司Chernin Entertainment喺上年就同Netflix簽訂優先認購協議，即代表Netflix好有可能會成為《洛克人》嘅獨家放映平台。另外，報導亦指出電影將由Ariel "Rel" Schulman及Henry Joost擔任導演兼編劇。

（圖片截自：Rockman Corner）

除此之外，演員陣容、上映日期、劇本通通都未知，而且Netflix日前所公布嘅2022年嘅放映名單又冇佢份，估計呢部作品最快都要2023年先會問世。文中亦提到，出年就係《洛克人》35周年，話唔定到時會有更多消息。之不過《洛克人》真人化難度咁高，應該唔係咁易拍得好睇，或者冇消息，就係最好嘅消息。