繼兒童版全地形電動車Cyber​​quad，金屬哨子Cyber​​whistle之後，Tesla又出新周邊商品喇！為慶祝德州超級工廠（Gigafactory）即將竣工，今次官方特別製作咗一款充滿德州特色嘅金屬皮帶扣，售價為150美元，結果上架唔夠1日即被搶購一空。

據官方介紹，呢款皮帶扣採用壓鑄鋅雕刻而成，造工非常精緻，中間刻有一粒星星（德州又名Lone Star State）以及Tesla嘅T字Logo，星星嘅周圍仲刻上一句說話「Don't Mess With」，模仿德州交通部叫人唔好亂掉垃圾嘅宣傳口號「Don't Mess with Texas」。或者臨近聖誕，大家都忙於買禮物畀親朋好友，所以呢個價值US$150（約HK$1,170）嘅皮帶扣上架唔夠一日就賣清光，喺ebay更被炒貴一倍以上轉賣。順帶一提，Elon Musk噚晚突然話Tesla「有機會」接受用狗狗幣（Doge）購買「周邊商品」，令幣價立即飆升。