HBO嘅《Game of Thrones》曾經係無數人最愛嘅電視劇——會用「曾經」除咗因為套劇已經完咗，更因為《GOT》最後一季劇情飽受批評，唔少人都認為佢爛尾——但於劇集中飾演Tyrion Lannister嘅Peter Linklage近日接受訪問時，就為《GOT》嘅結果辯解，基本上就係話「我覺得無問題喎！」

圖片：IMDB

Peter Dinklage近日接受《New York Times》訪問以宣傳新戲《Cyrano》，當中就被問到對《GOT》最後，由Bran Stark成為Westros國王嘅睇法，而就佢語帶諷刺咁回應：「啲人就係想見到啲靚靚白人一齊奔向夕陽。其實套劇係虛構架，入面有龍架，大家接受現實啦！」佢認為《GOT》嘅本質就係打破大家嘅想法，呢樣亦係佢鍾意套劇嘅原因，而劇集結局其實都係呼應緊呢個主題。「係，套劇係叫《Game of Thrones》，但到頭來我遇到嘅所有人都係黎問我『最後邊個會坐上王座？』明明套劇其實仲有更多意義，我都唔明點解大家淨係關心呢樣。」

圖片：IMDB

「我最鍾意嘅，係 (第八季中) 條龍燒咗個王座嘅一幕，有啲似係了結咗個其實唔重要嘅話題 (邊個會坐上王座)，就好似套劇嘅創作者同大家講『收聲啦！唔係講緊呢樣呀！』佢哋一直都係咁做，你估計應該係咁，佢哋就畀另一樣嘢你。每個人都去估個故事會點發展，但我覺得所有人嘅版本都唔夠依家呢個好。」

另外佢亦為最後一季中某角色嘅「極速黑化」辯解：「如果你對歷史有認識，你去睇下歷代暴君嘅發展，冇人一開始就係暴君，係一個過程黎，而我鍾意睇權力如何腐化呢啲人。當你品嘗到權力嘅時候，會對你嘅道德標準有咩影響？你知啦，人其實好複雜架！」

資料來源：New York Times