被視為僅次於奧斯卡金像獎嘅金球獎，先前主辦單位HFPA因被指缺乏「種族多元」而慘遭荷里活圈內人杯葛，向來負責轉播嘅NBC電視台亦宣布唔再直播。如今又因為變種病毒Omicron持續肆虐，大會決定縮減典禮規模，最終今屆金球獎將會喺冇明星、冇紅地氈、冇傳媒嘅情況下於下周一舉行...

由荷里活外國記者協會（HFPA）主辦嘅金球獎（Golden Globe Awards）近年風波不斷，先係被揭會內87名成員一位非裔人士都冇，而被批評缺乏「種族多元」，另外又因為前主席Philip Berk被爆出私下講過「BLM運動係種族仇恨運動」等言論，引起圈內人大為不滿，其中「Black Widow（黑寡婦）」演員Scarlett Johansson就拉大隊呼籲大家唔好同HFPA合作，Tom Cruise亦退回三座金球獎以示不滿。

雖然事後HFPA承諾會增加黑人成員，今年新增嘅21名會員當中亦有6位黑人記者，但似乎仍然未能挽救局面。其中憑主演《魷魚遊戲》入圍3項大獎嘅李政宰，日前就表示由於疫情及Netflix表明抵制金球獎，所以決定唔出席頒獎禮。另外根據外媒Variety報導，HFPA有去信邀請明星參與，但就冇人答應會出席。

結合種種原因，今年金像獎將會冇電視台轉播、冇紅地氈環節、冇明星、冇觀眾、冇傳媒，只有部份已接種疫苗，以及於48小時前曾接受檢測嘅HFPA成員出席，暫時未知會用咩形式公布賽果。