恐怖電影系列《死神來了（Final Destination)）》可謂千禧年代經典，各種估你唔到又血腥嘅死法令人印象深刻，前前後後總共拍咗5集。事隔10年有多，片商終於宣布要再拍續集，而且MCU版《蜘蛛俠》導演Jon Watts亦會加入製作。

據外媒《Variety》報導，今次片商搵嚟MCU蜘蛛俠三部曲導演Jon Watts同佢老婆Dianne McGunigle，聯同《死神來了》系列監製Craig Perry及Sheila Hanahan Taylor共同製作，並由《爆血新婚夜（Ready or Not）》編劇Guy Busick及Lori Evans Taylor共同撰寫劇本。新作確定會喺串流平台HBO Max上映，但就未知具體日期。

《死神來了》首部電影於2000年推出，以各種離奇又血腥嘅死亡場景聞名，11年間總共拍咗5集，合共票房高達6.57億美元。唔知新作故事會沿用舊有公式「主角預知災難>帶領朋友避過一劫>生還者逐一離奇死亡」，定抑制會有其他新意思呢？