次世代遊戲主機PS5及Xbox Series X推出超過一年，至今仍然嚴重供不應求，而且又有大量黃牛黨搶購及炒賣，令一眾真機迷叫苦連天。不過，最近一位黃牛公司老闆接受外媒《Sky News》訪問時，就認為自己嘅工作係培養緊年輕企業家...

黃牛商人Jack Bayliss，目前經營緊一間名為「Aftermarket Arbitrage」嘅黃牛服務公司，每月收取30英鎊費用，為訂閱者提供PS5、Xbox Series X、顯示卡及波鞋等熱炒商品最新庫存/補貨情報，令訂閱者能夠早著先機搶購貨品，繼而炒賣獲利。

雖然佢呢盤生意助長炒風，搞到好多真玩家買唔到機，但佢就完全唔愧疚，仲覺得符合佢個人道德標準，認為凡事都有兩面，鬧佢哋係黃牛嘅傳媒同公眾都冇睇到好嘅嗰一面（幫少部份人賺錢？）。對佢嚟講，遊戲機係奢侈品而非必需品，所以畀得起原價450英鎊買嘅話，就應該唔差在畀多100英鎊。

Jack Bayliss表示，目前1,500位訂閱者當中，有唔少都係「非常後生」，認為自己嘅工作係幫緊班後生仔建立個人事業，更話多得佢嘅服務，有部份訂閱者透過炒賣就賺到足夠錢，能夠辭去正職，有更多時間可以陪屋企人、翻新屋企、為小朋友添置一個攀爬架、買新車畀老婆同自己等等。

若然Jack Bayliss講法屬實，可想而知目前黃牛規模有幾誇張，有人可以純粹透過炒賣轉售即可謀生。