英國安德魯王子因捲入美國性侵案，上週被英女皇收回所有公務職分、榮譽軍銜及皇家慈善贊助人身份，其中就有成立於1656年，英國御林軍衛兵師歷史最悠久、曾參與拿破崙戰爭、兩次世界大戰、以至阿富汗、伊拉克等戰爭嘅「擲彈兵衛隊 (Grenadier Guards」嘅榮譽司令一職。而據英國媒體報導，衛隊內部就屬意由劍橋公爵夫人凱蒂接任，仲好努力咁說服緊有關方面添！

擲彈兵衛隊

圖片：Pixabay

安德魯王子被褫奪所有職銜之後，按慣例就會由英女皇本人暫代其職，然後由衛隊內部推舉下任人選予女皇選擇。而據擲彈兵衛隊內部高層人士向英國《The Times》透露，於衛隊內部嘅跨官階投票中，凱蒂就成為隊中下一任榮譽司令嘅首選，「我哋個個都好仰慕佢，佢好似冇行錯過任何一步咁。只要佢接受咗個工作佢就會投入去做，而我哋都想搵個真係會融入我哋嘅人」。

假若凱蒂真係成為擲彈兵衛隊嘅榮譽司令，佢將成為衛隊366年歷史以來，第一位被任命嘅女性榮譽司令。

圖片：Wikipedia

值得一提嘅係，上週嘅消息就話會於英國時間週一公佈下一任榮譽司令人選，但最新消息就話會延遲公佈。而據英國軍方人士向傳媒透露，原定接任嘅的確唔係凱蒂，但突然宣佈延期公佈，就代表有關方面真係考慮緊畀凱蒂接任嘅可行性。

資料來源：The Times