自從疫情爆發，口罩已成日常生活必需品，有人甚至為咗進一步提升防護效果而戴兩個口罩，係咪真係有效就唔清楚喇，但最近英國著名學府劍橋大學就做咗項研究，發現如果戴完口罩再包一層絲襪喺外面，能夠提升口罩貼合度，有效減少病毒微粒吸入量！

相信大家都知一般外科口罩其實唔能夠完全緊貼塊臉，口罩同臉部之間總會有些少罅隙，病毒有機會乘虛而入。為咗研究點樣改善口罩貼合度，早前劍橋大學研究人員就搵嚟4名受試者，分別戴上一般外科口罩同KN95口罩，再搭配7種唔同嘅佩方式進行測試，例如用膠紙黐住口罩兩側、將掛繩打個結、用沙布塞住空隙等等。

受試者經過7分鐘模擬交談、轉頭、深呼吸等測試後，結果顯示無論係KN95定一般外科口罩，最有效改善貼合度嘅方法就喺將絲襪包喺口罩外面，能夠將KN95口罩及一般外科口罩嘅貼合係數（Fit Factor）平均提升27.7及7.2，從而有效減少病毒微粒吸入數量。

雖然研究就冇表明測試所用嘅絲襪厚薄度（應該愈厚愈勁啩...），但絲襪牌子就會影響防護效果。該研究已刊登於學術期刊《PLOS ONE》2月號，有興趣了解更多嘅朋友去該網頁瀏覽完整報告。