情人節冇準備花頂多回復單身，但喺某啲國度冇準備花就可能會好大鑊！2月16日係北韓一年一度嘅大日子「光明星節」，亦即係已故領導人金正日冥壽，屆時當地會舉辦一系列表演活動，並喺街上擺滿被稱為「金正日花」嘅紅色秋海棠，為節日營造喜慶氣氛。之不過，今年有花農就因為未能確保鮮花按時盛開，而被判勞改半年。

據南韓傳媒《DailyNK》報導，由於今年柴火供應不足，一位負責種植「金正日花」及「金日成花」嘅花農無法維持溫室合適溫度及濕度，導致大量鮮花枯萎，即使重新種植亦趕唔上喺節日前開花，所以被判下放勞改營6個月，而負責控制溫室鍋爐嘅員亦被判勞改三個月。

「金正日花」由日本園藝學家加茂元照花費20多年時間培育而成，並於1988年送到北韓慶祝金正日生日，以示日鮮兩國友誼，北韓當地有多個專門種植呢種植物嘅溫室。