每一代人，都有好幾部陪伴佢成長嘅難忘動畫，對於70後嚟講可能係《飄零燕》，80/90後就係《EVA》、《幽遊白書》、《男兒當入樽》，而00後或者係《鬼滅之刃》、《咒術回戰》。最近日本富士電視台，就邀請到唔同年齡層藝人選出8部令人難忘嘅動畫作品，唔知你又屬於邊一代呢？

圖片來源：ガジェット通信

節目組分別邀請到「25歲或以下」、「26-45歲」以及「46歲或以上」三代藝人聚首一堂，要求佢哋評選出8部令人難忘的傑出動畫，結果顯示出各世代差異，其中比較有趣嘅係1999年出版嘅《ONE PIECE》係落入「25歲或以下」而唔係「26-45歲」，而《龍珠》就成功以《龍珠》及《龍珠Z》兩部動畫成為橫跨兩個世代嘅人氣作品。

咁當然啦，呢個調查並非正式統計，冇大家心儀嘅作品都唔出奇，況且好多25歲以上嘅朋友都會睇《鬼滅》《巨人》嘅，但如果講到最難忘，你又係咪會揀返《男兒當入樽》呢啲童年經典呢？

（排名不分先後）
25歲或以下：《紫羅蘭永恆花園》、《鬼滅之刃》、《咒術迴戰》、《進擊的巨人》、《東京復仇者》、《排球少年！！》、《我的英雄學院》、《ONE PIECE》

26-45歲：《EVA》、《男兒當入樽》、《多啦A夢》、《龍珠Z》、《美少女戰士》、《寵物小精靈》、《名偵探柯南》、《幽遊白書》

46歲或以上：《飄零燕》、《宇宙戰艦大和號》、《機動戰士高達》、《小甜甜》、《巨人之星》、《銀河鐵道999》、《龍珠》、《法蘭德斯之犬》