作為一個成年人，好多時都會覺得小朋友做嘅嘢、講嘅嘢係童言童語，唔需要認真對待。但有時小朋友認真起上黎，分分鐘仲叻過我哋呢班所謂大人。好似日本嘅六歲幼稚園學生大木隆之將，就熱愛恐龍到可以去糾正出版社嘅錯處。

《Jurrasic World》入面嗰條就係滄龍

今年六歲嘅隆之將有個現年十歲嘅姐姐，由於姐姐自小就鐘意收集恐龍圖鑑，所以隆之將細細個就已經接觸到恐龍嘅書籍，三歲時就已經同媽媽講「因為恐龍會咬人所以我鍾意」。而且隆之將唔只係將啲圖鑑當公仔書咁睇，而真係有將啲內容記入腦。所以佢有一日就細心地發現，由講談社發行嘅《動く図鑑ＭＯＶＥ恐竜》中，將滄龍嘅活躍時期寫成「白堊紀前期」，與其他書寫「白堊紀末期」有唔同。

《動く図鑑ＭＯＶＥ恐竜》

隆之將將個發現同媽媽分享，而媽媽亦非常認真看待隆之將嘅發現，先係自己上網確認過滄龍嘅活躍時期的確係白堊紀末期，然後就寫信畀講談社提出意見，講談社方面亦非常盡責，承認錯誤之餘仲表示會於改版時修正錯誤。媽媽對於隆之將真係發現到出版社嘅錯誤感到驚訝，仲話個仔平時坐唔定，但到佢睇書時就非常安靜，「可能面對你熱愛嘅嘢，就真係唔同啲」。黎緊就會升上小學嘅隆之將話，自己嘅夢想係「發現新嘅恐龍化石」。我都衷心希望隆之將可以繼續追夢呀！

資料來源：kanaloco.jp