人為咗自己鍾意嘅嘢，有時真係可以完全唔計較金錢，就好似官方高達粉絲會「Gundam Fanclub (GFC)」，就推咗個價值34,100Yen，即係近HK$2,300嘅手機架，你問貴唔貴？貴！但你問想唔想要？好想要！

呢個手機架係由著名嘅機械設定師大河原邦男設計，採用元祖高達RX-78-2嘅盾牌為藍本，結構本身就已經非常有機械嘅味道。整體 (除咗手機支撐架前面嗰兩塊圓形膠之外) 都係用上金屬製造，其中底座係用陽極酸化嘅5052鋁，個盾就係用陽極酸化嘅A1050純鋁，而盾牌上嘅聯邦軍軍章就用上黃銅，全重223g，唔單止撐得起電話，撐平板電腦都冇問題。而自護嘅愛好者亦可以將盾牌換成鑲有自護紋章嘅底板。

更重要嘅係，呢個手機座唔係有錢就買到，而係只限GFC嘅高級會員訂購，而要成為高級會員就雖然交一年一萬Yen (約HK$650) 嘅會費，即係如果你依家先發現自己好鍾意高達、好想買呢個座，未計運費都要HK$3,000落樓。