要數近日全球最熱門嘅電影，咁就非Matt Reeves執導、Robert Pattinson主演嘅新版《The Batman》莫屬，不過香港依家嘅情況…大家與其等戲院開返，不如停套戲登陸網上平台仲快！而近日HBO就因為網站出錯，意外曝出《The Batman》登陸HBO Max嘅日子！

卻說近日有人發現HBO嘅網站上多咗個介紹《The Batman》嘅頁面，當中除咗有少少電影介紹外，最重要係寫咗電影將會於4月19日登陸「On Demand」，相信係指HBO Max，而由4月23日起亦會一連三日於HBO拉丁頻道播放。目前HBO已經將該網頁下架，但據外國媒體《Deadline》引述知情人士指，網頁上寫嘅日期都係正確嘅。換言之《The Batman》將會於3月4日喺戲院上映後46日登陸HBO Max。

點解要特別點出「46日」？大家仲記得Warner Bros. 於2020年宣佈，2021年會實施「串流同步」政策，亦即電影會同時於戲院及HBO Max上映，結果被Christopher Nolan等大人物吊起黎鬧嗎？結果Warner Bros. 於去年「屈服」，話2022年會回復正常，電影於院線播放最少45日後先會登上HBO Max，而今次《The Batman》於院線上映46日登陸HBO Max，就完全符合當日嘅承諾。再考量到HBO Max去年受惠於「串流同步」訂閱者大增、今年《The Batman》回歸院線又就黎衝破5億美金票房，真係不得不佩服Warner Bros.嘅決策力。

資料來源：Deadline