雖然目前冇確實證據證明外星人存在，但如果真係有外星嘅話，人類又應唔應該主動聯絡佢哋？

據外媒《New York Post》報導，NASA科學家正著手一項名為「Beacon in the Galaxy（BITG）」嘅計劃，旨在向外太空發送信息，希望有朝一日能被外星人接收，從而與人類展開聯繫。科學家將基本數學及物理概念、地球生命生化成份、太陽系及地球表面數碼化描述、已知球狀星團位置、人類形像及DNA結構等信息，透過二進制編碼形式發送，若然外星人成功解碼，就會得到多張像素化插圖，其中一張更係一男一女裸體圖片。

事實上，人類好多年前已經試圖聯繫外星人，NASA早喺70年代所發射嘅無人太空船「Pioneer 10(先鋒10號)」，機身上就有一塊鍍金鋁板刻上一男一女裸體圖像，以及一系列有助推斷太空船發射位置及日期嘅物理信息，如同太空版本嘅漂流瓶，希望外星人「執到」之後可以聯絡人類。後來NASA甚至整咗隻「金唱片」射上太空，入面收錄多達55種語言歌曲以及各種大自然聲音(動物叫聲、風聲、海浪聲)，希望向外星人介紹人類所身處嘅世界。