早前同大家提及過，1926年出品嘅原版《小熊維尼》（Winnie-the-Pooh）版權於年初正式進入公家領域，意味住任何人都可以拎嚟個名同故事嚟二創。最近有片商就忽發奇想，製作出血腥真人版電影《Winnie the Pooh：Blood and Hone》，恐怖造型引起網民熱烈討論。

據外媒《Variety》報導，電影剛於本月初正式煞科，目前處於後製階段，暫時未知具體上映日期。故事講述小熊維尼及豬仔(Piglet)被剛升讀大學嘅Christopher Robin拋棄，由於缺乏食物來源而變得生活艱難，最終回復動物本性，四處尋找獵物。大家從劇照可見，維尼同豬仔嘅造型完全打破舊有可愛形象，變得相當野性兼詭異，豬仔甚至乎生出長長嘅獠牙，對住浸緊浴嘅女士虎視眈眈。

雖然原版《小熊維尼》版權已經對大眾開放，不過紅色T-Shirt版小熊維尼造型仍然屬於迪士尼，所以導演Rhys Frake-Waterfield盡力忠於原著版本，將維尼上身衣服變成格仔恤衫，而豬仔就身穿黑色外套，免得迪士尼告上法庭。

原版《Winnie the Pooh》造型（圖片截自：britannica.com）