由Netflix及Constantin Film攜手製作，改編自CAPCOM同名遊戲嘅真人版《生化危機》喺今日公開正式預告，展示T-病毒大爆發嘅末日世界，唔知大家有咩睇法呢？

Netflix版《生化危機》首季共8集、每集一小時，將以原作遊戲為背景，透過兩條時間線講述一個全新故事。第一條時間線（2022年）講述14歲嘅Wesker姊妹Jade及Billie搬到新浣熊市（New Raccoon City）居住，並逐漸發現父親Albert Wesker隱藏能夠毀滅全世界嘅黑暗秘密。而第二條時間線就係10幾年後嘅未來世界（2036年），受T-病毒感受嘅動物及人類喪屍高達60億，而正常人類僅餘1,500萬人，已經長大成人嘅Jade喺呢個新世界一邊掙扎求存，一邊被關於妹妹、父親以及自己嘅祕密糾纏。

除咗各種血腥暴力畫面外，大家亦可以喺預告見到原作嘅喪屍狗、獵殺者（Licker）、巨型蜘蛛等怪物，片尾甚至出現經典Boss暴君（Tyrant），預計7月14日正式上架。