《Friends》喺唔少人心目中，都係一部無可挑剔嘅處境喜劇神作，神到劇集由2004年播完到依家已經18年，都仲有人會拎出黎不停翻睇，證明佢嘅笑點係經得住時間考驗。不過由當年開始，劇集就已經因為缺少黑人角色而備受批評，近日主要創作人Marta Kauffuman更加為呢部上個世紀開播嘅劇集公開道歉，捐出400萬美金支持黑人學生，希望平息民怨。

圖片：Los Angeles Times

《Friends》故事發生於真正「咩人都有」嘅紐約，但劇集無論係主要角色，甚至臨時演員都係以白人為主，就算偶有黑人演員參演，最長都只係出現幾集就冇下文，所以由當年劇集播緊嘅時候，就已經被批評「冇足夠黑人代表」。Marta Kauffuman接受《Los Angeles Times》訪問時就回憶，當年嘅佢完全唔覺得係咩問題，仲因為覺得大家不停針對《Friends》而感到厭煩。

圖片：IMDB

不過經過20年嘅歲月，社會氣氛嘅改變，Marta Kauffuman對事件嘅睇法就有大幅改變。佢話自從2020年George Floyd事件之後，佢突然了解到自己當年係唔覺意地進行「系統化嘅種族歧視」，「就係嗰一刻我開始審視過去我有參與過嘅嘢，然後發現我係需要修正路線。」佢於2020年ATX電視節上曾經講起呢件事，而且講到喊；於去年嘅《Friends》特備節目中亦再次談到此事，但佢就認咁都唔足夠。於是近日再向美國Brandeis大學嘅非洲及非裔研究部門捐出400萬美金 (約HK$3000萬) 以協助研究，於訪問中亦承諾會於未來嘅創作中，有意識地確保無論幕前定幕後都有有色人種參與。

資料來源：Los Angeles Times