自從Amber Heard於與前夫Johnny Depp嘅誹謗案中大敗後，AH方就一直講話判決有幾唔公平、又搵各種理由試圖推翻裁決，但都不獲法院受理。結果過咗兩個月後，AH方律師就正式通知美國維珍尼亞法院表明會上訴。換言之，呢單世紀誹謗案即將有Round 2啦！

圖片：Law & Crime

據《CNN》等媒體報導，AH方律師日前正式向法院提交「上訴通知」，即係表明佢哋會上訴嘅立場 (但未算係正式提交上訴)，但法庭文件就未有顯示佢哋提出上訴嘅理據。而AH方嘅發言人於週四發出公告，「我們認為法庭犯下錯誤，阻礙一個與第一修正案相符的公平、公正裁決，所以我們會就裁決上訴。」同時發言人亦已經預料到網上反應，「我們知道今日的通知會於Twitter上點起火頭，但為了保障公平與正義，有些步驟是需要的。」

圖片：Law & Crime

而JD方發言人隨後亦發出回應：「陪審團經過六個星期審訊、聽過大量證據後，得出一個明確而且一致的裁決，認為被告多次誹謗Depp先生。我們對於維持原判充滿信心。」

早前法官Penney Azcarate曾推翻AH方對於證人身份真確性嘅質疑，再早前佢亦確認如果AH要提出上訴，就要先賠足原裁決中、AH方律師多次強調AH賠唔起嘅1035萬美金畀JD。咁既然依家AH正式提出上訴，即係佢變到錢出黎？

資料來源：CNN