5月時《Hunter x Hunter》作者富樫義博 (以下簡稱「富奸」)開設個人Twitter，主要更新原稿進度，結果瞬間引起全城熱話，第一日就已經有過百萬追蹤、第二日就已經突破200萬，用4日時間就超越《我的英雄學院》作者堀越耕平成為最多人追蹤嘅日本漫畫家。

而時隔個令月，富奸個Twitter追蹤人數於今日正式突破300萬！同時最新嘅十話《Hunter x Hunter》原稿似乎亦就黎畫完！

圖片：截圖自冨樫義博 @Un4v5s8bgsVk9Xp

喺漫畫迷心中，富奸一直都有「拖稿停更」嘅形象，但如果你去睇佢個Twitter，就會發現佢其實非常自律。事實上由佢於5月24日開設Twitter以黎，真係每一日都有更新自己嘅原稿進度，雖然大部份更新都只係見到寫住頁數嘅原稿紙一角，而且幾乎每日都只能夠完成一頁，但的確係緩慢而穩定地有進度。而到今日富奸亦透露已經「完成哂所有台詞」，日前亦話「399話畫緊背景」，考慮到上次《Hunter x Hunter》係更新到390話，而近年《Hunter x Hunter》復刊通常係一次10話，亦即係話原稿進度可能已經進入尾聲！

圖片：截圖自冨樫義博 @Un4v5s8bgsVk9Xp

不過比起原稿進度，更令人在意嘅或者係富奸嘅身體狀況。眾所週知富奸多年黎不停停更嘅主要原因，係佢嘅嚴重腰痛問題，而經過將近兩個月嘅作畫後，富奸嘅身體似乎已經到達極限。佢於上週六更新時話，身體嘅症狀並冇改善，治療同回復佔據咗大量原本可以用黎工作嘅時間；到週日時更加因為右手實在太痛苦，只係畫咗一格。相信畫完呢十話之後，佢真係需要好好休養啦。