由Netflix及Constantin Film攜手製作，改編自CAPCOM著名遊戲嘅真人版劇集《Resident Evil（生化危機）》，自宣布開拍以嚟就爭議不斷，上架後更獲得一面倒負評，分別於評分網站Rotten Tomatoes及IMDb取得26%及3.9超低分，可以稱得上係近年最差嘅遊戲改編影視作品。

《生化危機》第一季Rotten Tomatoes觀眾評分只有26%

據外媒《Deadline》報導，雖然《生化危機》於7月14日上架後一度登上Netflix英語劇集TOP 10排行榜，首周全球錄得7,270萬觀看小時，但未夠三個禮拜就跌出排行榜消失得無影無蹤，無法維持大型IP嘅應有熱度。由於收視及口碑都未如理想，所以Netflix決定腰斬節目，唔再續訂第二季。

Netflix版《生化危機》以原作為背景，透過兩條時間線講述一個全新故事。第一條時間線（2022年）講述14歲嘅Wesker姊妹Jade及Billie搬到新浣熊市（New Raccoon City）居住，並逐漸發現父親Albert Wesker隱藏能夠毀滅全世界嘅黑暗秘密。而第二條時間線就係10幾年後嘅未來世界（2036年），受T-病毒感受嘅動物及人類喪屍高達60億，而正常人類僅餘1,500萬人，已經長大成人嘅Jade喺呢個新世界一邊掙扎求存，一邊被關於妹妹、父親以及自己嘅祕密糾纏。