現年51歲嘅關繼威，13歲時就以《奪寶奇兵之魔域奇兵》出道，後來轉任特技演員，到2002年頭出演港產片《無限復活》後就無幕前工作，直到今年先憑《奇異女俠玩救宇宙 (Everything Everywhere All at Once)》復出，並將會加入Marvel劇集《Loki》第二季。早前佢就分享於Disney「D23」中，與「福伯」Harrion Ford相隔38年重遇嘅暖心事。

在 Instagram 查看這則貼文

Ke Huy Quan（@kehuyquan）分享的貼文

卻說上月在D23中，關繼威以《Loki》第二季卡司嘅成份出席，而福伯亦為Lucas Film嘅《Indiana Jones 5》站台，於是二人不約而同地身處同一棟建築之中。關繼威接受《New York Times》訪問時，話當時係助手話佢知福伯就喺攝影棚出面，問佢想唔想去打聲招呼，「我諗，緊係好啦，我38年冇見過佢啦喎！於是我走出去，距離Harrison Ford大概15尺左右嘅距離，睇住佢同Phoebe Waller-Bridge傾緊計。我行埋去嗰陣個心跳得勁快，『佢認唔認得我架？對上嗰次佢見到我，我仲係個細路黎咋喎？』」

「我行埋去，然後佢就轉頭指住我，加埋佢個經典、出名嘅『Harrison Ford發脾氣樣』。我心諗，死啦呢鋪，佢應該以為我係Fans然後叫我唔好行埋去。點知佢指住我問：你係咪小輕快 (Short Round，又譯小滑溜，關繼威於《魔域奇兵》嘅角色名)？我當場就好似返返去1984年，我仲係個小朋友咁，『係呀Indy！』，然後佢就話，過黎攬下先！」

關繼威於九月時曾經於社交媒體發佈過佢同Harrison Ford嘅合照，合照中關繼威的確係笑到好似個小朋友咁。

資料來源：Entertainment Weekly