憑Marvel《雷神奇俠》系列走紅嘅Chris Hemsworth，最近接受體檢時意外發現體內共有兩組APOE4基因，罹患阿茲海默症（俗稱老人痴呆）機率比普通人高出8至10倍，決定暫別影壇爭取時間陪伴家人。

現年39歲嘅Chris Hemsworth日前為宣傳新作《Limitless（挑戰極限）》接受外媒《Vanity Fair》專訪，自爆拍攝期間接受身體檢查時，意外發現體內含有2組來自父母嘅「APOE4」基因，導致罹患阿茲海默症機率比普通人高出8至10倍，而且Chris Hemsworth祖父亦是患者之一。據美國國家衛生院研究指出，約4分之1人擁有1組APOE4基因，但只有2-3%人同時擁有2組APOE4基因。

得知消息後，Chris Hemsworth決定暫別影壇好好休息，陪伴家人享天倫之樂，但就唔係退休，只係未來挑選工作時會更嚴謹。與此同時，佢亦強調公開個人健康狀況並非想博同情，亦唔係為咗節目宣傳，而係希望提高大眾對阿茲海默症認識。

《Limitless with Chris Hemsworth》由國家地理頻道製作，共有六集。Chris Hemsworth聯同世界頂尖長壽專家挑戰激發身體極限能力，發掘令身心長時間保持更敏銳、更強壯及更健康嘅方法，目前已登陸Disney+。