由日本漫畫家臼井儀人創作嘅《蠟筆小新》，故事搞笑無厘頭深受大人小朋友歡迎，Fans遍佈全球各地，隨住劇場版系列迎來第31部作品，今次官方就搞搞新意思首度將小新立體化，唔知大家覺得3D版嘅小新如何呢？

蠟筆小新最新劇場版《新次元！蠟筆小新THE MOVIE 超能力大決戰 ～飛吧飛吧手卷壽司～》由《爆漫王。》真人版電影導演大根仁執導，《STAND BY ME：多啦A夢3D》動畫團隊「株式會社白組」負責製作，從籌備、到故事構思、再到CG製作足足花咗7年時間，同時亦係咁多部劇情版之中製作時長最長嘅一部。

今次劇場版講述宇宙飛來兩個神秘光球，小新被其中一個擊中，從而獲得用patpat控制或吸附物品嘅超能力。與此同時，另一個獲得同樣超能力嘅男人就計劃毀滅世界，於是小新便化身超級英雄拯救地球，電影將於8月4日喺日本率先上映。