唔少中外演員都曾經講過，演戲嘅吸引之處就可以「投入一個唔係自己嘅人嘅生活」。不過英國女星、Netflix劇集《The End of the F***ing World》女主角Jessica Barden近日接受一個訪問時，就話佢非常睇唔慣一眾出生「上流 (Posh)」嘅演員繼續做一啲來自工作階層嘅角色，仲將此行為稱為：「工作階層旅行」。簡而言之，就係佢覺得演員們唔可以做與其出身不同嘅角色，做返自己就最好啦。

Jessica Barden (左)

圖片：Netflix 《The End Of The F**king World》

事情嘅開端，其實要由曾於《Crown》第四季出演戴安娜王妃嘅Emma Corrin講起。呢位出身於倫敦富豪區Royal Tunbridge Wells，爸爸係生意人媽媽係言語治療師、本人讀私立中學再上劍橋嘅27歲女演員，近日於另一個訪問中，稱希望能夠「用誇張口音，大紅頭髮，出演一部Gritty (堅韌、真實) 的蘇格蘭獨立電影」。

而呢句說話，似乎就激嬲咗出身於Yorkshire、媽媽係會計員爸爸係懲教職員嘅Jessica Barden。於是佢接受《The Sunday Times Culture》雜誌訪問時，就話：「我好憎人用Gritty或者Feisty (活躍、決斷、猛烈)呢啲字。用Gritty黎代表工作階層、用Feisty黎代表你有意見，我每次聽到都覺得想死。對我黎講，如果我接到一個『Gritty』嘅角色，係代表嗰個角色要畀人家暴。點解啲人可以咁講嘢？點解大家仲可以接受上流階層演員黎工作階層『旅遊』？」

Emma Corrin

圖片：Netflix 《Crown》

簡單啲講，就係Jessica Barden認為Emma Corrin將「演一個普通女仔」稱之為「Gritty」，係有「何不食肉糜」嘅感覺，更延伸到一個演員唔應該出演與其出身不乎嘅角色。但英國網民對頗為反對Jessica此番言論，當中唔少人都提到「演戲」嘅本質就係「扮演一個唔係自己嘅角色」。亦有人諷刺道：「好啦，咁依家大家就做返自己，舞台劇又好電影又好，總之做一個同自己一模一樣嘅角色，淨係個名唔同咗啫——FYI，咁咪唔叫做戲囉！」