微軟早前與任天堂簽下十年合約，確保會於未來十年內，於任天堂系列主機 (即Switch或其後繼機) 上推出《Call of Duty》遊戲，其背後原因就係避免收購遊戲開發、發行商Activision Blizzard嘅提案因為「壟斷」而被阻止。不過近日英國競爭及市場局 (CMA) 就對合約提出質疑：「乜Switch嘅機能玩到《Call of Duty》咩？」

Xbox系列開發商微軟於去年一月提出以687億美金，收購《Call of Duty》、《World of Warcraft》、《Diablo》等遊戲系列嘅開發、發行商Activision Blizzard。由於當初市場估計，微軟完成收購後，所有Activision Blizzard嘅遊戲都會變成Windows及/或Xbox獨佔，所以引起一眾玩家、以至「對家陣營」Sony質疑收購觸犯反壟斷法。

而微軟近日先後宣佈，與有經營雲端遊戲平台GeForce Now嘅Nvidia，以及擁有Switch主機嘅任天堂簽下十年合約，確保未來嘅《Call of Duty》遊戲都會於以上兩個平台發行。實際上就係同玩家以及一眾監管機構講：「唔係架，唔係得我自己啲機先玩到，你睇Switch都玩到架！」

不過據GamesRadar報導，英國嘅CMA似乎就唔太信任微軟嘅說法。CMA早前公佈初步調查結果，指佢哋發現「礙於機能差別，大部份第一身射擊遊戲於任天堂主機上都運行得不太順暢」，而即使係用雲端方法令任天堂主機用家能夠玩到遊戲，玩家都需要額外畀錢訂閱雲端遊戲服務、又或確保網絡連線質素，「即使Switch能夠連接第三方雲端遊戲服務，佢都唔會係如PS平台一樣嘅競爭者」。

簡單黎講，就即係就算微軟話會於其他平台推出《Call of Duty》遊戲，但考慮到雲端遊戲嘅不足、Switch嘅機能等因素，結果都係同「Xbox獨佔」冇咩分別，都係有可能違反反壟斷法。所以微軟能否成功收購Acitivision Blizzard亦為未知之數。