講起「漫畫」，大部份人第一時間都會諗起「日本漫畫」，但其實韓國「條漫」近年嘅影響力亦越黎越大，其中《與神同行》、《梨泰院Class》等更因改編成真人劇集而更廣為人知。而據日本Twitter「商標速報bot」報導，著名日本漫畫出版社「集英社」於本月初註冊「條漫」商標及網站，疑似有意引進「條漫」。

[商願2023-22359]
商標: [画像] /
出願人: 株式会社集英社 /
出願日: 2023年3月3日 /
区分: 9類(保安用ヘルメットほか), 16類(事務用又は家庭用ののり及び接着剤ほか), 28類(遊園地用機械器具ほか), 35類(広告業及びこれに関する情報の提… pic.twitter.com/wDko0s0Jt8

— 商標速報bot (@trademark_bot) March 13, 2023

「條漫」起源自韓國網上漫畫，正式名稱為「Webtoon」，即「Web」及「Cartoon」嘅融合。相比起日本漫畫來自書刊嘅「翻頁」、「每頁由右至左、上至下」閱讀方法，條漫則以「方便手機閱讀」為主，所以採用垂直長條型結構，用盡手機螢幕之餘，讀者亦只需上下滑動就能閱讀，而且通常都係全彩圖。又因為每一話其實都係一張長條形嘅圖，所以又稱條漫。

而據「商標速報bot」報導，集英社於3月3日註冊新商標「Jump Toon」，並同時註冊網站「Jumptoon.jp」，似乎就係有意打入條漫市場。但由於目前情報稀少，所以未知集英社係會推出日本原創條漫，定引入韓國條漫。

條漫於韓國年輕市場佔重要席位，LINE及KAKAO兩大平台每日瀏覽量高達百萬次計，而隨住韓國文化流行全球，條漫亦慢慢開始影響其他國家嘅讀者及創作者。如果大家有嘗試過向無睇開漫畫嘅人推坑某部作品，或者都會知道呢個世界係有人無法理解漫畫「由右至左、上至下」的閱讀方法，相比之下條漫嘅「閱讀門檻」就更加低。而當影響力深遠、目前只得「頁漫」嘅集英社都開始擁抱「條漫」，或會改變整個漫畫市場未來嘅走勢。