惡搞「世界名作劇場」嘅《生化危機4 重製版》宣傳片《RE名作劇場：不思議村子裡的里昂》終於嚟到第三話，今集內容係惡搞「直升機」Meme。

相信玩開《生化危機》系列嘅玩家都知道，遊戲內嘅直升機9成都會爆炸收場，其中《生化危機4》就有一幕講述飛行員Mike駕駛武裝直升機營救Leon，強大火力瞬間將喪屍村民打到稀巴爛，正當Mike以為自己已經完全清場，並透過對講機向Leon邀功、表示要一齊去酒吧飲杯嗰陣，突然就被一位村民用火箭筒擊毀。

今集《RE名作劇場：不思議村子裡的里昂》似乎係惡搞呢個Meme，同時嘲笑Leon係「載具殺手」。片中講述Leon同Ashley拜託一位木工爺爺製作交通工具逃出村莊，但兩人等待期間被喪屍村民圍毆彈飛到空中，最後咁啱撞上木工爺爺所駕駛嘅直升機（點樣用木頭整直升機就唔清楚啦...）。聽日（24日）就係遊戲正式發行日，所以估計呢輯搞笑動畫應該出埋第四話就會大結局，不過機迷反應非常熱烈，唔知CAPCOM會唔會考慮再拍落去呢？