由「Mario之父」宮本茂親自監製嘅動畫電影《The Super Mario Bros. Movie》上週上映後票房勢如破竹，目前已突破3.77億美金 (約502億Yen)，除咗打破由《Frozen 2》創下嘅首週票房紀錄 (約3.6億美金) 之外，更即將打破由《鬼滅之刃 無限列車篇》創下嘅日本動畫全球總票房紀錄 (5.07億美金)，氣勢相當驚人。

Metacritic 評分 (圖片：Metacritic)

爛蕃茄評分 (圖片：RottenTomatoes)

有趣嘅係，外國影評人同觀眾們對於電影嘅評價，就可以話係天差地遠。電影於Metacritic上嘅傳媒影評人得分僅為47/100，但觀眾評分就有8.7/10；爛蕃茄嘅影評人評分只有56%，但觀眾評分就高達96%。

當中唔少觀眾都認為電影高度還原《Super Mario Bros.》嘅遊戲風格，而且非常享受電影中嘅任天堂彩蛋，除咗令大人們非常滿足之外，小朋友們亦睇得好開心，係「難得唔爛嘅遊戲改編電影」。

但同樣嘅嘅元素，去到影評人口中就變成「好似睇緊人玩一隻大家無份玩嘅Mario遊戲」同「淨係得一堆彩蛋」，唔少人亦指電影幾乎毫無劇情可言，甚至將電影同1993年上映，爛到成為經典Cult片嘅真人版瑪利奧電影相比。可見影評人對於《The Super Mario Bros. Movie》有幾討厭，同時亦令唔少觀眾於評價中質疑傳媒影評人嘅可信性。

值得一提嘅係，Metacritic上一眾影評人中，本身風格就偏向「宅宅」嘅《Collider》以及《IGN》分別畀出83及80分，係一眾傳媒影評中最高分嘅；一眾美國影視媒體如《The Hollywood Reporter》、《Variety》、《Rolling Stone》及《Entertainment Weekly》等，就畀出70分左右嘅中等評分，最低嘅評分就主要來自一眾傳統大報，例如英國《The Telegraph》就畀出20分低分，《New York Post》同《New York Times》亦分別畀出25及30分。

換言之，《The Super Mario Bros. Movie》某程度上係曝露咗傳統媒體以及一般觀眾 (玩家) 對於遊戲改編電影嘅不同期望。玩家們要嘅就係入場感受同遊戲一樣嘅氛圍，但影評人就希望睇到一個「故事」。考慮到遊戲嘅講故事方法本身就同電影有所分別，唔少遊戲嘅故事線亦簡單到基本上幾句講完，強行加入故事就會開始偏離遊戲感，難怪多年黎嘅遊戲改編電影都係「順得哥情失嫂意」，又或者直接兩頭唔到岸啦。

資料來源：CNN