自從早前嘅「壽司郎事件」後，一眾迴轉壽司都被逼採取應對措施，以保證食物及餐廳衛生。唔少人亦擔心事件會令「迴轉壽司」慢慢消失。近日有日本網民就發現有壽司店利用電子螢幕取代壽司輸送帶，以營造「迴轉」嘅氣氛，亦令人感慨未來迴轉壽司可能真係會絕跡。

はま寿司の回転レールが概念化したタッチパネル。
会員情報にお気に入りのネタを登録して、このタッチパネルに好きなネタだけ流せるとか色々面白い体験作れそう。
pic.twitter.com/DZ1IZo3XT8

— ミヤジマ (@x_years_ago) April 12, 2023

「壽司郎事件」後，受害者「壽司郎」早前全面取消於輸送帶上放壽司，改為全點餐模式；而「藏壽司」就表示會引入AI監察系統，防止客人作出奇怪行為。而近日有網民發現，另一連鎖迴轉壽司店「はま壽司」嘅部份分店於翻新之後，已經拆除原有嘅壽司輸送帶，並將輸送帶改裝成個長條形嘅輕觸式螢幕，螢幕會以走馬燈方式顯示店內提供嘅壽司，客人點擊壽司圖片就可以落單。簡單黎講，即係整咗條「虛擬輸送帶」出黎。

其後有其他網民指出，「はま壽司」於早年疫情流行嘅時候，就已經開始用呢個方法黎取代「實體壽司輸送帶」。唔少人都表示呢個方法既能保證食物衛生，又保留到「迴轉壽司感覺」，似乎就係「壽司郎事件」後嘅最佳做法。不過亦有部份網民認為，呢個方法實在太好，甚至未來可能會成為主流，加速「實體迴轉壽司店」嘅末落，有人慨嘆，遲啲可能要同啲小朋友講：「以前啲迴轉壽司店，真係有壽司喺到轉架」。