由黑人女歌手Halle Bailey主演嘅真人版《The Little Mermaid（小魚仙）》上周四正式上映，據外媒《Deadline》報導，該片北美開畫首4天斬獲1.175億美元，而海外票房則收6,830萬美元，全球票房合共約1.86億美元，成績超越2019年真人版《阿拉丁》（北美首4天票房為1.168億）以及兩部《黑魔后》系列電影。但由於《小魚仙》電影製作成本高達2.5億美元，能唔能夠回本仍然係未知之數。

至於評價方面，雖然唔少影評人都彈部戲「參差不齊」甚或「平庸」，但影評網站Rotten Tomatoes（爛番茄）上卻獲得95%新鮮度超高觀眾評分，與《魔戒二部曲：雙城奇謀》、《沉默的羔羊》等經典並列。但值得注意嘅係，呢個95%評分係由有買飛入場且通過認證嘅「認證用戶」交出，若然將評論檢視改為「所有用戶」，評分將跌至56%新鮮度，若仔細研究每一則影評亦可以發現觀眾反應非常兩極，一係畀五星，一係就畀一星。

憑藉《小魚仙》人氣急升嘅Halle Bailey，緊嚟仲會出演由史提芬史匹堡監製嘅音樂劇《The Color Purple》，故事改編自Alice Walker同名小說，以美國喬治亞州鄉村地區為背景，講述1900年代初期南方黑人婦女生活，預計今年12月25日北美上映。