日本漫畫發展沿遠流長，而且百花齊放，歷年更產出過無數知名漫畫家、以及無數咁多部經典作品。而近日日本票選網民「Ranking.goo」就邀請網民選出「對漫畫界有最大影響的傳奇漫畫家」，結果就由有漫畫之神稱號嘅「手塚治虫」成為冠軍。

手塚治虫筆下經典角色

Ranking.goo今次嘅排名並非單純針對「作品好唔好睇」，更重要嘅係漫畫家對於日本漫畫界嘅影響力，所以上榜嘅全部都係資歷深厚嘅「神檯級」作者。例如第十至第四名就分別為「荒木飛呂彦」、「北條司」、「冨樫義博」、「永井豪」、「高橋留美子」、「安達充」以及「尾田榮一郎」。其中出道近三十年嘅尾田榮一郎，已經係算係整個榜單再「年輕」嘅代表。

而榜單嘅前三名就分別係《多拉A夢》作者「藤子・Ｆ・不二雄」、《龍珠》作者鳥山明，以及被稱為漫畫之神嘅「手塚治虫」。

手塚治虫

手塚治虫出生於1928年嘅日本大阪，雖然自細就鍾意畫畫，但其實佢本來打算從醫，更考獲醫科博士學位，但後來因為眼見戰後日本氣氛低迷而希望創作漫畫為大眾提供娛。其創作生涯極為多產而且種類繁多，當中包括《小飛俠阿童木》、《怪醫秦博士》、《小白獅》、《三眼小子》等經典名作。

但如果要數影響力最深遠嘅作品，大概就係於1947年推出嘅長篇處女作《新寶島》。手塚治虫於《新寶島》中一改日本漫畫過往偏向四格漫畫嘅「簡短」風格，除咗整個故事有近200頁嘅超長篇幅外，亦加入大量如電影鏡頭嘅分鏡畫面，以及效果線、擬聲詞等元素，一手一腳將日本漫畫推向現在大家熟悉嘅「新漫畫」階段，亦啟發「藤子・Ｆ・不二雄」、「石之森章太郎」等大量「後進」開始創作漫畫。所以話佢係影響力最大嘅日本漫畫家，應該都冇人會有異議啦。

資料來源：Ranking.goo