近年人工智能快速發展，導致唔少創作者都擔心自己份工會於不久嘅將來被AI取代，甚至目前正進行緊嘅荷里活編劇罷工，其重點之一就係防止片商利用AI取代編劇們嘅工作。而日本著名文字創作者、有「高達之父」之稱嘅富野由悠季，近日接受訪問時就表示唔擔心會被AI取代，更揚言AI創作嘅「只係廉價色情小說」，輕易就能夠分辨。

圖片：THE CHANGE

卻說現年82歲嘅富野由悠季早前接受日本媒體《THE CHANGE》嘅訪問，記者一開始就問到富野老師對AI嘅睇法，而富野老師就表示：「喺呢個電子化嘅世界，有咗ChatGPT呢啲工具，大家都真係唔需要再自己進行搜尋。但我認為，嗰啲一日到黑要講『一直以來多得你照顧 (いつもお世話になっております)』嘅人就可以用ChatGPT，但如果你用黎思考、創作，就唔會保持到超過十年，因為任何人一眼就睇得穿，『你呢篇嘢用AI寫架喎』…依家荷里活編劇們因為ChatGPT嘅版權問題大造文章，我就覺得其實冇咩威脅。」

「我唔認為AI創作與人類創作有任何可以比較嘅地方。重點係，AI究竟可以睇得明幾多人類嘅創作。佢哋只係用數據去理解，然後作出大方向嘅回答，所以會有生硬嘅地方；但人某程度上係柔軟嘅。」

圖片：THE CHANGE

富野老師用「性」黎做例子進一步解釋。「只係喺網上睇H漫或者成人影片嘅人，同真正知道性愛經驗嘅人，佢哋會有完全唔同嘅語調，而ChatGPT寫出黎嘅小說，就好似廉價成人書籍咁。人類其實好敏銳，一睇就知。但你 (記者) 似乎就冇呢種敏銳，我睇你用嘅字都相當廉價，我相信好似你咁嘅人就分唔到啦。」

《THE CHANGE》與富野老師嘅訪問總共有三部份，如果想睇全文的話可以去佢哋嘅官網。

資料來源：THE CHANGE