支援語音控制，又可以透過App自訂動作，不過價錢都非常驚人！

繼去年嘅全自動變形柯柏文機械人後，最近孩之寶聯同Robosen推出《變形金剛》Dinobots首領鋼鎖（Grimlock）機械人，能夠全自動變換恐龍及機械人模式。

據官方介紹，鋼鎖機械人配備34個高精度關節、85顆微型晶片以及六軸姿態感應器，能夠自動變形及還原原著多個動作場景，並搵嚟G1原版聲優Gregg Berger重新配音，內置超過150條音訊。而且支援語音控制，只要一聲令下佢就立即變形畀你睇，同時可以透過轉用手機App自訂動作同燈效等等。

目前鋼鎖機械人已開放預購，建議零售價為1,699美元（約港幣$13,300），而預購優惠價則為1,499美元（約港幣$11,700），預計今年秋季在美國正式推出。

資料來源：polygon