曾幾何時，日本瘋狂搞笑漫畫曾經盛極一時，當中大家最為熟識嘅，大概就係古谷實嘅《去吧！稻中乒團》以及浜岡賢次嘅《愛生事家庭》。後來因為《愛生事家庭》續作名稱都加上「XX！」嘅前綴，甚至有人誤以為同《稻》為同一部漫畫、又或同一個作者。

事實上《愛》系由1993年就一直無間斷連載至今，期間只休刊過兩次，最近一次就係上週開始，浜岡賢次老師宣佈因為要去「家族旅行」而休刊一星期。讀者們除咗紛紛留言多謝老師多年努力及專業態度外，當然亦會提起某個成為「休刊代名詞」嘅男人。

【告知】『浦安鉄筋家族』約23年ぶりに休載へhttps://t.co/1ac0wHYeYU

約23年ぶりに休載することが、連載誌『週刊少年チャンピオン』編集部への取材でわかった。休載理由について作者の浜岡氏は「家族旅行です。スイマセン!!」と説明。連載再開は8月3日発売の36+37号となる。 pic.twitter.com/9ExOtx45Ts

— ライブドアニュース (@livedoornews) July 20, 2023

卻說浜岡賢次老師目前於《《週刊少年Champion》》連載緊系列嘅第四部作品《超絕！愛生事家庭》，而上週就透過雜誌宣佈會休刊一星期，並於卷末簡短解釋休刊係因為要去「家族旅行」，並對讀者們致歉。事實上浜岡賢次自1993年起開始連載《愛生事家庭》系列，當中除咗系列之間會有數週休息之外，就只曾於2000年因到美國取材而休刊一星期，換言之今次係佢30年以黎第二次、過去23年來第一次休刊。

有趣嘅係，當初無論係《週刊少年Champion》定浜岡賢次本人，都以為係「30年來首次休刊」，但有媒體搵到2000年浜岡賢次曾經休刊一次，並向《週刊少年Champion》編輯部求證。結果編輯部去問返浜岡賢次佢先話：「係喎，我之前去過美國一次 (笑)」。

消息傳出後，唔少讀者一方面驚訝《愛》系列原來仲有連載緊，一方面亦佩服浜岡賢次老師多年黎一直創作。再加上「家族旅行」呢個咁有說服力嘅理由，所以大家紛紛表示體諒及支持。不過浜岡賢次老師長久而穩定嘅連載，就不禁令人諗起某個經常休刊嘅漫畫家，所以亦有人戲稱：「咁搞法《愛生事家庭》會成為《Hunter》嘅反義詞。」

資料來源：Livedoor News