四驅車係唔少八、九十後嘅童年回憶，不過當年買得起正版「雙星」(田宮,Tamita)嘅小朋友並唔多，大部份人都只能夠買啲連個包裝盒都印到濛查查嘅老翻代替。到幾十年後嘅今日，雖然當年嘅小朋友都變哂做有收入嘅大人，但要儲返哂以前想有嘅四驅車都唔容易。有見及此，田宮近日就決定將歷年出過嘅所有四驅車包裝繪圖結集成書，令大家能夠另類地儲齊所有四騎車。

田宮近日宣佈會推出一套兩本「タミヤ公式　ミニ四駆　パッケージアートコレクション (田宮官方 四驅車 包裝繪圖Collection)」，上下兩冊總共收錄咗超過300張四驅車包裝繪圖，當中涵蓋80年代播出嘅《四驅小子》，以及90年代播出嘅《四驅兄弟》中出現過嘅車款。而且用上高清原圖印刷，除咗可以睇到當年包裝盒上睇唔清嘅細節位，亦會包括當年遷就包裝盒大小而裁走嘅部份。

當年嘅店舖宣傳海報、動畫宣傳物料

黑色封面版

而除咗繪圖之外，每頁亦會有車款介紹、數據以及實物圖對照。另外亦會附上當年田宮發行嘅店舖宣傳海報、動畫宣傳物料等等。絕對能夠勾起大家嘅回憶。

「タミヤ公式　ミニ四駆　パッケージアートコレクション」上下冊售價為3,300Yen (約HK$176)，於小學館官方網站上有售。但值得留意嘅係，田宮官網、TAMIYA Plamodel Factory 新橋店，以及Yodobashi、BIC Camera官網上會有黑色封面特別版。如果大家想儲齊嘅話就要一次過買哂四本啦。

資料來源：PRTIMES