隨住早幾年疫情期間大家需要電腦在家工作、電腦晶片短缺令PS5等新主機於推出初期難以提升產量一機難求，再加上大部份遊戲大作都會跨平台推出，所以近年唔少機迷又再次回到「電腦遊戲」嘅懷抱之中。既然需求多咗，自然就有人不再安於傳統嘅「四方盒」主機外形。而Cooler Master早前就推出非常搶眼嘅「波鞋形電腦主機」，連「魔獸」Dwight Howard都有一部，相信就能滿足波鞋迷嘅砌機需要。

呢個「SNEAKER X 球鞋造型電腦主機」由著名電腦改裝高手Juggapat Modifier (JMDF) 設計，早於2020年就喺「Case Mod World Series 2020」亮相。今年5月時Cooler Master更邀請當時於台灣職籃打波嘅「魔獸」Dwight Howard合作，推出一部以其球衣為主題嘅特別版主機作慈善拍賣，另外再送多部畀「魔獸」自用。

主機最大賣點當然係充滿「Jordan感」嘅紅面白底、黑色點綴設計。「鞋身」部份主要為塑膠物料，入面有個鋁製結構供大家安裝電腦部件。「鞋舌」位置為透明設計，而「鞋身」左右兩個圈以及「鞋底」就有RGB燈提升質感。值得一提嘅係，「鞋口」部份真係開放式設計，所以如果你真係入手，就可能要考慮機身內部積塵嘅問題。

效能方面，目前Cooler Master官網販售嘅版本配有第13代Intel i7處理器、Nvidia RTX4070圖像處理器、32GB DDR5記憶體以及1TB M.2 SSD硬碟，老實講就唔算係市面上最頂級嘅打機配置，所以佢個17.9萬台幣 (約HK$43,300)嘅標價中，有好大部份都係用黎買個機箱。值唔值就各位見仁見智啦。

資料來源：Cooler Master