雖然Johnny Depp與Amber Heard嘅世紀官司已告一段落，但最近有Johnny Depp粉絲向法庭買下從未曝光嘅法律文件並公諸於眾，其中包括Amber Heard治療師嘅筆記，揭示更多不為人知嘅八卦。

據外媒《Variety》報導，Amber Heard曾向治療師Dawn Hughes透露，「水行俠」男星Jason Momoa曾經喺片場飲到爛醉，刻意打扮成Johnny Depp嚟激佢，並要求電影公司高層將佢踢出劇組。除此之外，Amber Heard亦表示自己捲入誹謗官司後，溫子仁導演對佢極為不滿，甚至將佢當成「賤民」看待，會喺片場大聲斥責佢，又唔畀佢喺網上發布有關《水行俠》嘅貼文，令佢覺得自己做錯事。

對此，DC發言人否認Jason Momoa飲醉嘅說法，並強調Jason Momoa一向都表現得好專業。而另一名工作人員亦表示Jason Momoa好賣力工作，雖然偶爾會飲下啤酒但絕對唔會醉住出現喺片場，亦冇打扮成Johnny Depp，穿搭一直都係波希米亞風格。DC發言人同時澄清，表示溫子仁導演一向非常尊重劇組所有人員，並於片場營造一個積極、協調嘅環境而聞名，《水行俠》當然亦唔例外。

報導亦提到，Amber Heard確實差啲冇得拍《水行俠2》，但同誹謗官司無關，而係首集《水行俠》上映後，片商華納兄弟同溫子仁都覺得佢同Jason Momoa缺乏化學反應，DC前CEO濱田沃特去年出庭時亦證實過呢件事。至於點解Amber Heard仲有得留低？消息人士就話全靠Amber Heard當時男朋友Elon Musk出面，透過律師去信威脅華納兄弟，揚言如果Amber Heard冇得留低拍，佢就會毀掉一切，結果華納兄弟屈服，讓Amber Heard繼續參演《水行俠》續集。目前Elon Musk並未回應此事。