近年漫畫改編真人版電影成為日本電影市場主流之一，不過唔少改編作嘅質素都非常參差，甚至令漫畫Fans用「慘遭真人化」黎形容。而參與過唔少漫改真人電影嘅橋本環奈近日於電視節目中透露，其實佢都認為某啲漫畫作品唔適合改編成電影，甚至舉出佢自己有份演嘅《王者天下》為例。

環奈BB於真人版《王者天下》中飾演「河了貂」

橋本環奈日前登上富士電視台節目《ぽかぽか》，期間佢就提到自己其實好易分心，唯獨睇漫畫時能夠專注。而當被問到最鍾意邊部作品時，「環奈BB」表示鍾意嘅作品太多好難揀，苦惱一陣之後就揀咗由原泰久創作，以中國戰國時代為背景、曾經改編成真人版電影而且環奈BB有份演嘅《王者天下》，仲表示「我非常鍾意睇原作漫畫，所以有份出演非常開心。」

而節目主持人岩井勇氣就追問：「你係咪因為覺得自己有可能出演真人版電影先睇《王》？」而環奈BB就頗直接地回答：「睇緊嘅時候，的確有諗過如果由我去演嘅話會係點。但老實講，我唔想佢被拍成真人版電影，咁樣講非常抱歉，但我真係唔係好想佢被真人化架咋。」

環奈BB於真人版《銀魂》中飾演「神樂」

環奈BB亦提到當年出演真人版《銀魂》嘅神樂一角時，感到非常大壓力。「佢唔係一個普通人，佢有特別嘅講嘢方法，但我又唔想演得太過刻意，如果唔係好愛個角色的話會演得非常辛苦，所以我希望只出演自己鍾意原作嘅作品。」

資料來源：Livedoor