近年日本動漫界似乎非常熱愛推出聯乘手錶，淨係今年目前為止、我哋報導過嘅就已經有《超時空要塞》、《EVA》、《勇者特急》、《幪面超人V3》、《鐵甲萬能俠》等出過類似產品。而最新加入戰團嘅，就有國民大作《One Piece》！佢哋近日宣佈會與Seiko合作，推出「路飛五檔」特別版腕錶。

所謂「路飛五檔」，係路飛當年食咗嘅「橡膠果實」覺醒成「人人果實尼卡型態」、獲得「太陽神尼卡」能力之後嘅狀態，最大嘅特色係頭髮以及全身衣服都會變成白色，當年連載到此時曾引起Fans們熱烈討論。而今次Seiko推出嘅「路飛五檔」特別版手錶自然係以路飛嘅五檔造型為主題，不鏽鋼錶殼及錶帶配上帶有沖壓花紋嘅純白錶盤，三點位置有金色嘅「草帽海賊團」標誌，而六、九、十二點小錶盤中就分別有「橡膠果實」、「太陽神尼卡」以及「D」字印花。

底蓋就有五檔標誌、獨立編號以及SEIKO字樣。另外包裝盒上亦有幻彩嘅橡膠果實圖案，打開後亦有全彩嘅路飛五檔插圖。

手錶限量5,000隻，連稅售價為54,780Yen，即約HK$2,860左右。貴就唔算好貴，但就真係Fans先會買得落手啦。

資料來源：PREMICO