Angelina Jolie表示如果佢喺2023年先加入演藝圈，好大可能唔會成為演員，或者會向舞台界發展，但肯定唔會選擇喺荷里活工作及生活。

近日Angelina Jolie接受《The Wall Street Journal》專訪分享離婚後生活及未來計劃，坦言自己已經受夠鎂光燈下嘅生活，表示當初入行嗰陣，並冇諗過要向大眾公開及分享咁多，假如係今日先入行，佢唔會選擇成為演員。

除此之外，Angelina Jolie亦表示與Brad Pitt嘅婚變令佢身心疲憊，血糖忽高忽低，離婚前6個月更出現貝爾氏麻痹症（面癱），而且每次出門都會被注視及媒體報導，導致幾乎冇晒社交生活，唯一最親密嘅朋友就係佢6名子女，所以佢正在計劃離開荷里活呢個唔健康嘅地方，搬到柬埔寨定居。然而，因為目前仍然與Brad Pitt有離婚官司在身，所以計劃被迫推遲，同時冇辦法自由生活及到處旅行，一旦所有事件安頓好，佢就會立即行動。

《Maria》劇照

目前Angelina Jolie剛剛拍完由Pablo Larrain執導嘅傳紀電影《Maria》，講述美國籍希臘女高音歌唱家Maria Callas嘅一生，而佢亦承諾將會回歸演出《Maleficent（黑魔后）》第三集。

Angelina Jolie與柬埔寨嘅緣份可以追溯到2001年電影《Lara Croft: Tomb Raider（盜墓者羅拉）》，當時Angelina Jolie首次踏足柬埔寨，並發現該國遭受戰爭蹂躪後嘅慘況，令佢意識到呢個世界有更多人需要幫助，於是佢主動連絡聯合國難民署申請成為親善大使（Goodwill ambassador），出錢又出力造訪各地難民營，並於2002年在柬埔寨領養首位養子Maddox，同時成立基金會改善當地鄉下醫療及教育問題。2016年更執導首部劇情長片《First They Killed My Father（他們先殺了我父親）》，向觀眾講述70年代紅色高棉時間期發生嘅大屠殺事件。