電子遊戲自面世之初，就一直被人批評「教壞細路」，但對於遊戲嘅正向影響，就鮮有被人提及。而近日一個德國研究就發現，原來玩《Super Mario》能夠協助抑鬱症患症大幅降低抑鬱程度，而且效用比起傳統嘅藥物、心理治療更高。

德國波昂大學嘅博士學生Moritz Bergmann於今年8月發表其研究論文。文中指中重性憂鬱症（Major depressive disorder，MDD)患者往往會遭遇情感、心情及認知層面（例如記憶力）的下降，而過去曾有研究指出玩3D遊戲能提升健康玩家嘅認知能力，所以佢就做咗個實驗，希望睇下3D遊戲對於MDD患者是否亦有同樣功效。

Moritz Bergmann搵黎46名MDD患者，並將其隨機分成三組進行為期六週嘅療程，第一組會接受傳統嘅心理及/或藥物治療，第二組則會使用一個名為「CogPack」嘅認知能力訓練軟件，而第三組就玩2017年於Switch推出嘅《Super Mario Odyssey》。每組患者於實驗前後均會回答問卷以測量其抑鬱症徵狀、訓練動力及視覺空間記憶力。

結果發現，六週過後，《Mario》組中展現出高度抑鬱症狀嘅病患人數大降近50%，其餘兩組嘅數字雖同樣有下跌，但從統計學角度而言無顯著差別。《Mario》組同時亦比「CogPack」組有更高接受治療嘅動力。不過視覺空間記憶能力方面，「CogPack」組於所有相關測試中都有所進步，而《Mario》組就僅於一個測試中有同樣效果。

結論黎講，就係電子遊戲，至少係《Mario Odyssey》呢隻遊戲能夠減輕MDD患者嘅症狀，同時提高佢哋接受治療嘅動力。似乎有潛質成為一種新療法。不過Moritz Bergmann亦表明，此次研究嘅樣本數實在太少，往後需要有更大規模研究，先可以得出更準確嘅定論。

資料來源：Effects of a video game intervention on symptoms, training motivation, and visuo-spatial memory in depression