被視為「英國奧斯卡」嘅英國電影學院獎（British Academy Film Awards）日前於倫敦舉行頒獎典禮，《Oppenheimer（奧本海默）》一舉奪得「最佳導演」、「最佳男主角」、「最佳男配角」、「最佳電影」、「最佳攝影」、「最佳剪輯」以及「最佳原創音樂」共7項大獎成為大贏家。其中憑飾演美國原子能委員會高層斬獲「最佳男配角」嘅Robert Downey Jr.發表得獎感言時就幽默地感謝Christopher Nolan。

Robert Downey Jr.於台上簡短地回歸演藝生涯，並答謝Christopher Nolan提拔：「當我15歲時，我想成為Peter O’Toole。(《Lawrence of Arabia 沙漠梟雄 》主角、入圍奧斯卡影帝8次但從未獲獎)當我25歲時，我開始為Richard Attenborough同Anthony Hopkins工作。(RDJ成名作《Chaplin 卓別靈傳》導演及演員)當我35歲時，我終於明白Dickie點解會認為Tony比Peter更適合成為我嘅榜樣。到咗42歲，我參演咗兩部由Guy Ritchie執導嘅電影(指《神探福爾摩斯》系列)，學識點樣拍攝英式風格荷里活大片。然後我就喺MCU飾演一位叫做Tony Stark嘅角色整整12年，直到最近，嗰個叫Christopher Nolan嘅傢伙(dude)建議我嘗試以一種低調嘅演出方式，藉此挽救我日漸下滑的口碑，所以我就同其他提名者一齊共享呢份榮耀，真係一個不平凡嘅一年。」最後，RDJ亦不忘感謝導演、演員們、工作人員、片商等製作單位，以及老婆Susan Downey。

Robert Downey Jr.早於16歲開始演藝生涯，並於27歲時憑《卓別靈傳》走紅並首度入圍奧斯卡最佳男主角，但其後因為吸毒入獄名聲一落千丈，後來戒毒成功後再靠《神探福爾摩斯》、《雷霆喪星》、《鐵甲奇俠》等作品東山再起，其中Tony Stark呢個角色更佢紅遍全球。接下來，RDJ將與Sterling K. Brown、Robert DeNiro、Ryan Gosling以及Mark Rafflo等實力派演員角逐奧斯卡最佳男配角獎，究竟RDJ可唔可以憑《Oppeheimer》奪得人生首座小金人呢，3月11日正式揭曉。