《Fast & Furious（狂野時速）》正傳故事如無意外將於下集完結，不過由Dwayne Johnson主演嘅外傳電影《Hobbs & Shaw（狂野時速：雙雄聯盟）》續集仍開發當中。

由Vin Diesel主演嘅《Fast & Furious（狂野時速）》系列自2001年推出後一集比一集「狂野」，由最初嘅街頭飛車，逐漸演變成冰天雪地決戰潛艇，飛越摩天大廈，甚至衝出大氣層嘅動作爽片，二十多間年總共推出過11部作品（其中一集為外傳），總票房累積超過70億美元。然而，主演兼監製Vin Diesel日前就喺社交平台暗示，《Fast & Furious》系列正傳故事將於下集迎來大結局。

近日Vin Diesel透過個人Instagram分享《Fast & Furious 11》製作進度，表示自己剛同編劇及電影團隊開完會，用「令人難以置信」都不足以形容結局所帶嚟嘅興奮，同時感謝Fans們支持：「當大家都滿懷興奮迎接週末時，但我就諗起你哋...你哋無數嘅激情同熱情成為我哋創作嘅推動力，你哋嘅投入對系列嘅成功及演變帶嚟獨特影響，感謝你哋支持呢個跨足全球嘅系列，因為有你哋，呢個系列先可以超越大銀幕。最後一部作品唔單只係一個結局，更係對我哋呢個難能可貴嘅Family一次盛大慶祝。希望能令你哋感到驕傲！」

目前官方尚未公布《Fast & Furious 11》劇情細節，但據早前荷里活資深記者Jeff Sneider爆料，《Fast & Furious 11》將預算大減，製作成本唔會超過2億美元（上集成本3.4億），而戲情則會「回到原點」聚焦一場大型搶劫行動或賽車比賽，整體風格會更貼近首集《Fast & Furious》。另外，於《Fast X》飾演大反派「Dante」嘅Jason Momoa可能唔會回歸，將由一位全新反派取而代之，預計2025年4月上映。

資料來源：deadline