最近新一代性感女星Sydney Sweeney登上美國著名綜藝節目《Saturday Night Live》擔任客席主持，佢為節目做開場白時瘋狂自嘲，先係調侃自己有份參演嘅《Madame Web》冇人睇，再分享進加入荷里活嘅過程，最後仲用自己同Glen Powell嘅緋聞幽大家一默笑翻全場。

Sydney Sweeney出場時幽默地自介：「多謝大家好，我好高興嚟到呢度，我叫Sydney Sweeney。你可能喺《Anyone But You 真的狠愛你》或《Euphoria 毒癮女孩》見我過，但絕對冇喺《Madame Web 蜘蛛夫人》見過我。...我好高興今晚能令大家認識真正嘅我，我覺得大家都將我視為一位喺電視上尖叫、痛哭或做愛嘅女孩，有時候三者會同時存在，但事實上我唔係只得呢啲。」

接著，佢就向觀眾分享入行過程，表示自己嚟自華盛頓州嘅斯波坎，自細希望成為一名演員，父母亦非常支持佢，甚至會揸19個鐘車載佢到洛杉磯試鏡，並展示出當年向父母提出如何進軍演藝界嘅簡報，分別列出試鏡、搵經理人、拍廣告、拍微電影以及成為演員公會(SAG)成員5大計劃。其後Sydney Sweeney更幽默地表示，如果呢5招都行唔通，佢仲有Plan B：「Show boobs（露出胸部）」，隨即引起全場觀眾爆笑。

不過好戲在後頭，由於Sydney Sweeney同Glen Powell拍攝及宣傳《Anyone But You》期間顯得非常親密，因此傳出唔少緋聞，Sydney Sweeney就用呢件事幽大家一默：「我同Glen Powell有路？當然唔係真啦！拍攝期間我未婚夫一直在場，我想同大家講，佢係我夢中情人，我哋仲一齊緊，而且感情比任何時候都好。佢甚至今晚都有嚟到現場支持我，可以將鏡頭切換到佢嘅畫面嗎？」點知鏡頭一轉，畫面就切到坐喺觀眾席嘅Glen Powell。Sydney Sweeney馬上解釋：「呢個唔係我未婚夫啦！我真正嘅未婚夫喺化妝室呀！」