近年流行講執笠，但其實執笠潮並非只發生於香港。好似日本嘅遊戲機中心，早於2010年起就已經面臨經困難，自疫情起更不時傳出地標級嘅遊戲機中心都捱唔住。但有去過嘅人或者會好奇，明明就唔係冇客，有時甚至可以話係人頭湧湧，點解都仲係做唔住呢？近日有日本組織就發表咗報告，提出真正原因：毛利率太低。

據日本《帝國數據銀行》近日發表嘅業界報告指出，2023年間全日本再有18間大型遊戲機中心結業，比2022年嘅15間多，亦係過去五年以來最多。事實上過去五年間，日本大型遊戲機中心數目已經大減三成。

不過根據日本遊樂產業協會公佈嘅數字，2021年嘅行業營業額高達4492億Yen，比2020年增加一成，當時就已經似乎擺脫疫情嘅影響。但以大型機台為主嘅傳統遊戲機中心，因為面臨家用機嘅競爭而令客人減少，所以依然逐漸被市場淘汰。

圖片：www.tdb.co.jp

另一邊廂，以夾公仔機為主嘅新型遊戲機中心雖然吸引到客人，但經營環境就因為消費稅、硬幣兌換手續費、電費等成本上漲而被壓縮。據《帝國數據銀行》計算，目前客人於遊戲機中心每使100Yen，當中只有6 Yen真係進入遊戲機中心個袋，其他全部都係成本黎。再加上夾公仔機機台、以及入面啲禮品嘅價格都不停上漲，所以唔少中小型遊戲機中心都只能結業。

報告特別提到，雖然開喺日本街頭嘅遊戲機中心賣少見少，但就有越黎越多大型遊戲機中心進駐大型商場，並以家庭客為主要客群。所以「遊戲機中心」本身唔會消失，但自昭和、平成時代而來嘅「街機」文化，似乎就面臨重大試驗

資料來源：帝國數據銀行