最近中國遊戲機配件商「魔派（MOBAPAD）」於官方社交平台爆料，列出多項Switch 2硬件規格。首先係手掣方面，新一代Joy-Con體積會更大，依然會搭載ALPS雙軸線性摩打及HD震動，SL及SR鍵鍵帽會改用金屬材質。而左右Joy-Con背面，以及右邊Joy-Con Home鍵下方將加入全新按鍵（如下圖），連接機身部份則現時嘅滑軌式設計改為磁吸式，通過電流控制磁吸。

消息來源表示，Switch 2將支援現時嘅Joy-Con手掣及Switch Pro手掣，不過就冇具體表明係純粹無線支援，定還是可以插入部機使用，但考慮到新一代Joy-Con體積更大及連接方式（磁吸）不同，應該就只係支援無線連接。

除此之外，Switch 2螢幕尺寸將提升至8吋，最高解像度可達1080p，機身下方依舊會有一個Type-C接口，背板支架可調範圍更大，而Dock底座邊角將變得更圓，並最高支援4K解像度輸出。最後就係Switch 2可以向下兼用Switch實體卡帶，不過Switch就無法使用Switch 2卡帶。

順帶一提，曾準確爆料Switch OLED規格嘅西班牙傳媒《Vandal》亦收到風Switch 2 Joy-Con手掣將改為磁吸連接，進一步增加傳聞可信度。